رواية غموض خالد للكاتبة هدوئي كاملة

* 2 *














بعد صلاة العصر رحنا للملعب



فعلا كان فيه شباب كثير مجتمعين ,,, لعبنا المباراه



المغرب جلست انا وابراهيم نرتاح شوي



انا = ابراهيم وش كان يقصد صالح يوم قال لخالد الى الحين ماشفت ابوك .؟



ابراهيم = الصراحة مدري ,,, انا خالد هذا ماعرفه زين ولا اشوفه الا من عطله لعطله



انا = اهاااا



ابراهيم = وش رايك نرجع



انا = نصلي العشا ونرجع



ابراهيم = طيب صار



بعد الصلاة رجعنا



كان شارعنا مليان بالاطفال يلعبون



دخلت البيت ومالقيت فيه الا خلود ومعاذ



استغربت انا متأكد اني ماشفت اخواني برا



انا = خلود وين سالم وسلمى .؟



التفتت علي خلود مستغربة



خلود = برا ,,, ماشفتهم وانت جاي .؟



انا = لا



وطلعت مرة ثانية من البيت



وقفت عند الباب ولا شفت احد منهم



غريب ,,, شفت مجموعه بنات صغيرات يلعبن



رحت لهن ولا شفت سلمى عندهن ولا حتى سالم



اففففففففف وين راحوا



= خااااااااااااالد



التفتت لمصدر الصوت



وكانت سلمى راكبه بالسيارة المرسيدس بمكان الراكب ومطلعة راسها من الدريشة وتناديني



وش جابها هذي هنا



رحت لها وانتبهت ان خالد بالسياره وبحظنه سالم و يتفرجون على شي ولما قربت كان اللي يتفرجون فيه جوال ,,, وسالم يكركر من الضحك



سلمى = خالد و خالد هههههههه 2 خالد



وقفت عند باب الراكب وفتحت الباب وانا معصب



بطرف عيني شفت خالد يشوفني مستغرب



انا = سلمى انزلي ,,, سالم انزل اشوف ,,, معليش خالد من اليوم وانا ادورهم والحين وقت نومهم تعرف بكرة مدارس



سلمى = انا مادرس



انا = انزلي وانتي ساكتة



سالم = خالد بس شوي بشوف هذا وبعدين اروح انام



انا بعصبية = وش تشوف .؟



اخذ سالم الجوال من يد خالد ومده لي يوريني اللي يشوفه



سالم = هذا ,,, يضحّك ,,, بشوفه بس شوي



انا = قلت لك رح البيت



خالد = خلاص سلّومي رح نام بكرة مدرسة



سالم = يووووووه ,,, مدرسة مدرسة مدرسة كل يوم مدرسة



خالد = ههههههههههه ايه كل يوم مدرسة



نزل ونزّل سالم معه وانا نزّلت سلمى



قلت لسالم وسلمى



انا = يله اشوف قدامي



راحوا يركضون ودخلوا البيت



التفتت على خالد ,,, لقيته يقفل سيارته ,,, مدري ليه ماني مرتاحله



انا = بأي سنه تدرس .؟



التفت لي



خالد = بثالث ثانوي ,,, مع السلامة



ودخل بيت خاله ,,, استغربت وش فيه ذا ,,, معقول زعل لأني اخذت اخواني منه



يوّلي ,,, مو مرتاحله اصلا



رجعت البيت ,,, وحنا نتعشى سألت سالم وسلمى



انا = وش كنتوا تسوون مع خالد .؟



سالم = ماسوينا شي



سلمى = ركبنا معه السيارة وورانا جواله فيه اشياء تضحك مرررررررره وفيه العاب



انا = من متى وانتم معه .؟



سالم = من شوي



انا = قال لكم شي .؟



سالم = ماقال شي



قلت له احذره



انا = سااااالم



فعلا خاف



سالم = قال بأي سنه تدرس وووو قال وقال



و برطم وسكت



انا مستغرب = وش قال .؟



خلود = خالد وش فيك خل سالم ياكل



انا بعصبية = سالم وش قالك خالد .؟



سالم = سأل ابوي وينه .؟



انصدمت ووقفوا اخواني كلهم عن الاكل انسدت نفسهم مثل مانسدت نفسي ,,, سد الله نفسك ياخالد



انا بألم = وش رديت عليه .؟



سالم = قلت انا ماعندي اب وام



بكت خلود بصمت



سلمى = خالد حنا ليه مالنا ام واب مثل صديقاتي .؟



قلت لها اصرفها



انا = يله روحوا ناموا بكرة مدرسة



وقمت عنهم رايح غرفتي



خالد ماسأل سالم هالسؤال إلا انه عارف من خاله اننا ايتام



ليه يستعبط ويسأل بزر ويجرحه بسؤال مثل وجهه



ان ماوريته بكرة ,,, اكيد بيدرس بنفس مدرستنا وين بيروح يعني



دخل سالم علي الغرفة ودخل فراشه



انا = صليت .؟



سالم = لا



انا = ليه



سالم = توني صغير



انا = لا والله احلف



سالم = والله



اففففففف



انا بعصبية = كيفك اقعد لا تصلي



في المدرسة دورت على خالد ولا شفته ولا حبيت اسأل عنه



وحنا راجعين كالعادة انا وماجد وابراهيم وصالح



ابراهيم = صالح مادرس خالد اليوم .؟



صالح = من خالد .؟



ابراهيم = خالد تركي قريبك



صالح = وانا وش دراني عنه



ماجد = قريبك



صالح بعصبية = يخسي ماهو قريبي



استغربت كره صالح له



انا = طيب وش فيك معصب



صالح = زوج عمتي يصير خاله ,,, ياخال ابوي حك ظهري ,,, ماهو قريبي



سكت وسكتنا ,,, وصلنا شارعنا ,,, وانتبهت ان سياره خالد ماهي موجودة



دخلت البيت وكان فاضي رحت لبيت ابو سعد عشان اجيب سلمى ومعاذ



ورجعنا ,,, لقيت سالم رجع البيت وكان لابس بدلته الرياضة بس



انا مستغرب = متى جيت .؟



سالم = تو ,,, خالد شف



وأشر على ركبته وكانت بدلته متمزقة من عند الركبة



فهمت عليه



انا = خل خلود تخيطه ماني شاري شي



سالم زعلان = لااااا ابي اشتري وحدة جديدة



سالم = لا ماني شاري ,,, خيط هذا وخلاص



سالم = لا خالد لااااا ابي اشتري وحدة جديدة كل اصدقاي شروا جديدة الا انا وبعدين انت ماشريتلي شنطة بعد مانت شاريلي بدلة ( وقعد يصيح ) ابي وحدة جديدة



ضاق صدري مامعاي الا 100 ريال اخربها ببدله ,,, وش يفهمه ذا الحين



انا بعصبية = سالم قلت لا يعني لا



وطلعت من عنده وانا متضايق شسوات الحين لازم القى وظيفة لازم



سالم طلباته كثيرة وخلود بعد لكن ساكته عن الاشياء اللي يخصها لكن ادري انها تبي ,,, سشوات .؟



العصر طلعت من البيت وانا الدنيا مسودة بعيني



شسوات الحين الشهر اللي فات لقيت وظيفة لكن حارس سوبرماركت و كانت الفترة من العصر الى الساعة 3 في الليل



اترك اخواني لحالهم من العصر الى الساعة 3 في الليل .؟



صعبه ,,, ماقدر اتركهم ,,, شسوات الحين ,,, اترك الدراسة واشتغل حارس في الفترة الصباحية والا وشلون



مالي ألا أكد



بس وشلون أكد وانا مامعي سياره ,,, ليتني مابعت سيارتي ياليت



بعد تفكير طوييييييل بهمي



رجعت البيت وانا مقرر اطلب سيارة احد جيراننا واغيب بكرة عن المدرسة واروح أكد طوال اليوم لين احصل مبلغ يسدني على الاقل يومين ,,, مع اني عارف ان ماورا المكدة مكسب ,,, كل اللي اكسبه يروح بنزين للسيارة ,,,. لكن ان شاء الله ماني كاد الا بوسط المدينة اما اللي يبون توصيلهم خارج المدينة ماني موصلهم ,,, ماعندي حل الا كذا



وصلت شارعنا على اذان المغرب لقيت اخواني سلمى وسالم يلعبون كالعادة مع اطفال زيهم



رحت المسجد وصليت ورجعت البيت



وبعد العشا بفترة طلعت من البيت عشان اطلب سيارة احد جيراننا



جيت ابروح لابو عبد الله بس تذكرت خالد وشفت سيارته واقفه



لا لا ماني رايح لابو عبد الله اخاف يطلعلي الخايس خويلد



ورحت لابو سعد واستأذنت منه سيارته ليوم كامل



وطلعت من عنده ورجعت للبيت



وقلت لخلود



انا = خلود تراني بكرة ماني راجع للبيت الا أخر الليل لا تحتروني لا على الغدا ولا على العشا



والتفتت لسالم



انا = سالم اذا رجعت بكرة من المدرسة هات معك سلمى ومعاذ من بيت ابو سعد ,,, مفهوم



سالم = طيب



خلود = ليه وين بتروح .؟



انا = بكد



خلود = وشلون ماعندك سيارة .؟



انا = اخذت سيارة ابو سعد



خلود = وبتتأخر .؟



انا = مدري على حسب



يوم الاثنين



غبت عن المدرسة وطوال اليوم وانا اكد اوصل هذا واوصل غيره اروح جنوب المدينة واوصل شخص لشمالها لكن كل اللي وصلتهم 6 اشخاص



اكثرهم يبون توصيل خارج المدينة ,,, وليتني كسبت مبلغ زين ,,, ماصفالي من المكدة بسبب البنزين الا 140 ريال



بعد صلاة العشا كنت تعبان وهلكان ونعسان مانمت اليوم بطوله وفوق هذا جوعان



خلني ارجع البيت واشوف اخواني يمكن محتاجين شي ثم ارجع أكد مرة ثانية لأخر الليل



دخلت الحارة وماشفت سالم وسلمى يلعبون مع الاطفال



دخلت البيت



انا = السلام عليكم



خلود مستغربة = خالد ! وعليكم السلام ,,, مو تقول بتجي أخر الليل .؟



انا = برجع مرة ثانية بس جوعان ,,, سويلي أي شي



التفتت على سالم وسلمى ومعاذ لقيتهم يلعبون بالعاب اول مرة اشوفها



سلمى تلعب بعروسه كبيرة نوعا ما



وسالم يلعب بسيارة على شكل همر كبيرة



استغربت وسألتهم



انا = وش هذا .؟



خلود = وش .؟



انا = وش الالعاب هذي .؟ من وين .؟



ترك سالم لعبته وراح شوي وجا ومعه بدلة رياضية جديدة



سالم بفرح = خالد شف ,,, اليوم اخذني خالد للسوق وشرالي بدلة وسيارة وسلمى شرالها هذا ( وأشر على الدمية )



انا مستغرب = مين خالد .؟



سالم بغرور = خالد صديقي



اخذت مدة عشان استوعب ,,, نقزت شيطاني قدامي ,,, الحين انا غايب عن المدرسة وطوال اليوم تحت الشمس أكد وتعبان وحارم نفسي عن النوم بس عشان اوفر قيمة احتياجاتهم



وأخر شي ,,,,,,,,,,,,,,,,,,,,,,



توجهت لسالم بعصبية وعطيته كفففففف وقعدت اضربه



انا = وش قلت انا ,,, مو قلت لا تاخذ شي من احد



واخذت اضربه ,,, طلعت كل التعب و الجوع اللي احس فيه ,,, وقعدت اضرب سالم



اسب واشتم وابرد كبدي فيه



جت خلود وقعدت تجرّني عنه



خلود بخوف = خالد بس ابعد عنه خااالد ,,, هو جا استاذن مني ابعد ابعد



تركت سالم والتفتت لخلود



انا بعصبية = انتي كنتي تدرين انه راح للسوق .؟



خلود وهي خايفة مني = ايه



دفعتها على ورا



انا بعصبية = وانا رايح اكد لمن .؟ ليش خليتيه يروح لييييييش



خلود بخوف = قال ابروح مع خالد وسمحتله



عصبت وعطيتها كف



انا = ولييييييييش تسمحينله ليييييييييه وانا معلمك اني ابروح اكد ليييييييييه



بكت ,,, التفتت على سالم اللي الى الحين يصيح



انا = متى رحت معه ياحماااااااار



يبكي ولا رد علي



انا بعصبية = متااااااااااااا



خلود وهي تبكي = العصر



سألت سالم



انا بعصبية = معكم احد .؟



سالم وهو يبكي وخايف مني = سلمى



تفاجأت ,,, سلمى بعد ,,, التفتت على سلمى و لقيتها هي الثانية تصيح



عصبت اكثر ,,, ان ماوريتك ياخالد



طلعت بعصبية من البيت ورحت لبيت ابو عبد الله ,,, ان ماطحنت عظامك ياخالد ,,, امس جارح الولد بسؤال مثل وجهه والحين يتصدق عليه ,,, ان ماوريتك



لقيت سيارته واقفة ,,, وضربت الجرس بعصبية ,,, طلع لي ابو عبد الله



حاولت اكون طبيعي قدامه



انا = السلام عليكم



ابو عبد الله = هلا وعليكم السلام ياهلا والله بخالد تفضل تفضل ياحيا الله خالد



انا = تسلم ياعم لكن ماعليك آمر تناديلي خالد



ابو عبد الله = خالد رايح للدكان مرسلته العجوز الحين يجي اقلط



حظه فلت مني لكن وين يروح



انا = اجل مرة ثانية انا بس بغيت خالد ان جا ياعم قلّه اني بغيته



ابو عبد الله وهو يشر على مكان وراي = هه هذا هو جا



التفتت وراي لقيت خالد لابس بنطلون جنز وفنيله سودا ومعه كيسه ,,, ذا مايلبس إلا بناطيل ماعمري شفته لابس ثوب ,,, مالت عليه وعلى شكله



قرب خالد ووقف عندنا ,,, هالمره مهمل نفسه شعره الطويل صاير حوسه



خالد بهمس = السلام عليكم



استغربت صوته متغير



ابو عبد الله = وعليكم السلام



والتفت ابو عبد الله لي



ابو عبد الله = وهذا خالد جا ,,, اقلط ياحياك الله



انا = تسلم ياعم لكن بغيت خالد بحاجة



والتفتت لخالد لقيته ماسك راسه بيد ويالله يفتح عيونه كأنه مصدع



خالد بتعب = بغيتني انا .؟



ابو عبد الله لخالد



ابو عبد الله بخوف = خالد فيك شي ياولدي .؟



خالد = لا ياخال ,,, تعب بسيط ,,, ماعليك



ابو عبد الله = آكلت دواك .؟



هز خالد راسه بلا



ابو عبد الله بتنهيده = الله يهديك



استغربت دوا ,,, وش دواه



التفت لي خالد وكأن زاد عليه الألم



خالد بتعب = اعذرني خالد مصدع وتعبان



وراح وسلم على راس خاله



خالد = اعذرني ياخال تعبان وابي انوم ,,, شف هذا وش يبي ,,, ( وهو يشر لي )



ابو عبد الله = تعشى اول ياولدي



خالد = ماشتهي



وراح ,,, ياسلام ,,, الحين انا جاي له يروح ويتركني ,,, مالت عليه احرجني قدام ابو عبد الله



انا متفشل = جاي له ياعم يتركني ويروح



ابو عبد الله = والله مادري وش اقولك ياولدي ,,, اعذره وانا عمك خالد عنده صداع مزمن يجيه من فتره لفتره ( تنهد ابو عبد الله وكمل بحزن) بعض الاحيان يفقد وعيه ,,, ادعله وانا عمك ان الله يشفيه ,,, انا وامه مالنا غيره



انصدمت صداع مزمن ويفقد وعيه



انا مستغرب = ووووششش صداع مزمن ,,, آآآآ ,,, ليه وش عنده بالضبط ياعم .؟



ابو عبد الله = والله مدري ياولدي ماجاله هالمرض إلا بعد حادث صار له بالرياض



صدمه ثانية حادث ,,, واخذت وقت عشان استوعب



انا = آآآ ,,, الله يشفيه ,,, طيب انا استاذن مع السلامة



ابو عبد الله = محتاج شي ياخالد اعتبرني زي ابوك لا تستحي



انا = تسلم ياعم ماحتاج شي ,,, مع السلامة



رجعت وانا افكر بخالد



حادث و صداع مزمن لدرجة يفقد وعيه



اهااااا توني افهم ,,, دايم اشوف على وجهه التعب لكن مانتبهت انه بسبب مرض كنت اظن انه هو شكله كذا ,,, بس صح وش يقصد ابو عبد الله انه ماله وامه الا خالد ,,, يعني خالد ماله اخوان .؟ وإلا وشلون



اول مادخلت البيت خاف مني سالم وهو مازال عليه آثار الصياح



جلست بحجرة التلفزيون وانا الى الحين افكر بخالد



خلود = خالد تبي اجيب العشا الحين .؟



تذكرت اني جوعان



انا = ايه



وحنا نتعشى سألت سالم



انا = سالم خالد قال لكم شي .؟



خلود بخوف = خالد خلاص عاد ماصارت ,,, آآآآ ,,, ضربتني و ضربت سالم بس عشان بدله وكم لعبة ,,, ماصارت



انا = ايه خلاص صار اللي صار ,,, بس انا ابي اعرف وش قالهم خالد



والتفتت لسالم



انا = سالم وش تكلمتوا عنه .؟



سالم بخوف = ماتكلمنا عن شي بس ودانا للسوق ودخلنا الالعاب ولعبنا شوي ورجعنا بس



انا = طيب هو وشلون عرف انك تبي بدلة .؟



سالم = انا علمته



عصبت وجيت بهاوشه لكن وش اسوي اذا الله بلاني باخو بقرة مثل سالم



انا بعصبية = كللللل ابلععععع



كملت عشاي وانا افكر فيه



يضحك مع اخواني ويكلمهم وانا يتهرب مني



كل ماحاولت اكلمه تركني وراح ,,, ليه .؟



رجعت السيارة لابو سعد ورجعت البيت انام

* 3 *









الثلاثاء



طوال اليوم وانا في المدرسة ماشفت خالد ,,, لا يكون الى الحين تعبان عشان كذا مادرس اليوم



الظهر بعد ماطلعنا من المدرسة وحنا داخلين الحارة سأل ابراهيم صالح بعناد



ابراهيم = اقووووول صالح قريبك اليوم بعد مادرس ,,, وييييييينه .؟



صالح بعصبية = ياليل الليل ,,, تفهم انت والا ماتفهم قلتلك ماهو قريبي ,,, وبعدين انا وش علي منه درس والا مادرس



انتبهت ان سيارة خالد ماهي موجودة



انا = سيارته ماهي موجودة



ابراهيم = شكله يدرس بمدرسة غير مدرستنا ,,, قليل ماشوفه وماسولفت معه الى الحين



انا = صالح هو له اخوان .؟



صالح بملل = له 4 اخوات ,,, تراكم اذيتونا فيه انت واياه



ابراهيم = انا ابي اعرف وش بينك وبينه



صالح = اففففففف اروح للبيت احسن



وراح



ابراهيم = وش فيه ذا .؟



انا = انا ادري



استغربت كرهه لخالد فعلا وش بينه وبين خالد .؟



بعد صلاة العصر بفترة وقفت عند باب البيت طفشان



وكانوا اطفال الحارة يلعبون ومنهم سالم وسلمى



لقيت ابراهيم واقف مع خالد عند سيارته وطاقينها سوالف



التفتوا لي وناداني ابراهيم ,,, رحت لهم ووقفت عندهم



انا = السلام عليكم



خالد وابراهيم = وعليكم السلام



التفتت على خالد ,,, شكل صحته اليوم احسن من امس لكن فيه هالات واضحه تحت عيونه ,,, تفاجأت يوم ابتسم لي



خالد = معصب امس ,,, وش عندك



تلعثمت شاقوله قدام ابراهيم



انا = آآآ ,,, انا امس معصب .؟ ما عصبت



خالد بابتسامه = امس واضح من شكلك انك معصب ,,, لا يكون جالس ببيت عمتك وانا مدري



ضحكت انا وابراهيم



انا = شكل صالح مطلع ريحتك



خالد بتنهيده = أي والله والمشكلة خالي وخالتي ساكتين هو اللي مدري وش يبي



ابراهيم = ما عليك منه (والتفت لي ) خالد اثر خالد مايدرس عندنا يدرس بمدرسة اهليه ههههه وحنا ندوره بمدرستنا هههههه



انا = اهااااا



خالد = خالد



التفتت له



انا = نعم



خالد = انت ماعندك سيارة .؟



تفاجأت من سؤاله ,,, نزلت راسي



انا = لا ,,, كانت عندي وبعتها



رفعت راسي



انا = ليه تسأل .؟



خالد = لا مجرد سؤال



وش فيه ذا اسألته دايم مثل وجهه ,,, مالت عليه



ابراهيم = وش رايكم نفرفر بالشوارع شوي .؟



لأن معاذ يومه كله حرارته مرتفعة عشان كذا ماقدر اترك البيت يمكن تحتاجني خلود او شي



انا = مرة ثانية ,,, ماقدر اروح الحين



ابراهيم = وراه .؟



انا = مشغول



التفت ابراهيم على خالد



ابراهيم = وانت .؟



خالد = انا ابمشي الحين للرياض .؟



ابراهيم = الرياض .؟ والمدرسة ,,, بكرة الاربعاء يالحبيب



خالد بابتسامه = غياااااااااااب



ابراهيم = اوووووووه مافيكم خير اروح لماجد وصالح ابركلي



وراح ,,, التفتت على خالد



انا = خالد بتسافر للرياض وانت امس تعبان



خالد باستغراب = ماني تعبان ,,, من قالك اني تعبان



انا = !!!!!!!!!



خالد = قصدك امس ؟ ,,, امس تعب عادي وبسيط يمكن لاني مانمت بالامس كله



انا = والصداع اللي يجيك دايم



طير عيونه فيني وسكت ,,, وطوّل وهو مارد علي



انا = وش فيك .؟



خالد = خالي قاللك .؟



هزيت راسي بإيه



خالد بتنهيده = الحمد الله على كل حال ,,, وش تبيني اسوي يعني ,,, اقعد في البيت ولا اسافر لاهلي



تلعثمت انا = آآآآ ,,, لا ماقصدت ,,, آآآ ,,, امممم



ماادري شاقوله



خالد = وش فيك معصب أمس .؟ كنت تبيني



زين سألني ,,, لازم اعلمه كيف يتأدب عشان مايتصدق على اخواني مرة ثانية



انا = كم قيمة بدلة سالم والالعاب .؟



خالد باستغراب = ليه .؟



انا = انت اللي ليه تشتري لسالم ,,, احد شكالك .؟ احد طلب منك تتدخل في شي مايعنيك .؟



سكت ومارد



انا بعصبية = كم .؟



خالد = هدية لسالم وسلمى



انا = ماني بزر عندك تكذب علي ,,, انت ماشريت البدلة لسالم الا لما هو علّمك ,,, صح والا لا .؟



سكت ولاني عارف اني ماقدر اسدد قيمة البدلة والالعاب سكتت عنه



خالد = تأخرت لازم امشي ( ومد يده لي ) اشوفك على خير ,,, مع السلامة



انا = توصل بالسلامة ( وصافحته )



ركب سيارته وشغلها ,,, تفاجأت بسالم وسلمى جوه أول ماركب سيارته



سلمى = وين بتروح .؟



خالد بابتسامه = الرياض



سالم = امك وابوك ليه مايجون هنا .؟



ضحك خالد = هههههه ان شاء الله اجيب أمي هنا بس هاه لازم تسلم عليها ,,, اتفقنا



سالم بفرح = اتفقنا



ومد سالم يده يصافح خالد يقاله توكيد اتفاق ,,, ضحك خالد وصافحه



تذكرت سؤال صالح لخالد عن ابوه ,,, قلت احرجه



انا = وابوك ماتبي سالم يسلم عليه .؟



طالعني وسكت ,,, ابتسمت شكلي احرجته



انا بابتسامه = ليش ماترد .؟



خالد = اذا شفته انا خليت سالم يشوفه ,,, وثاني مرة لا تتدخل في شي مايعنيك (والتفت لسالم وسلمى ) يله مع السلامة ياحلوين اشوفكم يوم السبت ان شاء الله



وراح ,,, انصدمت ,,, وش يقصد بالضبط ( اذا شفته انا خليت سالم يشوفه ) توني ادري انه يتيم ,,, الصراحه ندمت على احراجي له ,,, يالله كيف النعمه اللي هو فيها والسيارة الفخمة اللي معه مخليته كأنه مو يتيم ,,, ليتني ماحرجته ياليت



الاربعاء



خلود غابت عن مدرستها عشان معاذ ,,, مع ان جارتنا ام سعد طلبت منها تجيبه عندها لكن خلود عيت



في الليل كانت سلمى جالسة عندي في حجرة التلفزيون وتلعب بعروستها ,,, فرصة افهمها ان عروستها هذي حرام



انا = سلمى تخلصي من الدمية هذي



التفتت لي سلمى موب فاهمه شي



سلمى = ليه ,,, ابيها



جلست عندها احاول افهمها



انا = سلمى شوفي هذي لها عيون كأنها عيون حقيقية والمسي فمها وخشمها شوفي بارز ,,, الملائكة مايدخلون بيتنا لان هذي فيه ,,, فيه عروسات اسلامية مالها ملامح مثل هذي ,,, هذي صارت كأنها صنم ,,, تبين بيتنا يصير فيه صنم .؟



سلمى = الملائكة مايدخلون بيتنا .؟



انا = اذا كانت هذي فيه مايدخلون بيتنا



سلمى = بس ابيها



انا = انا ابحاول اشتري لك وحدة اسلامية



برطمت سلمى وكأن ماعجبها الكلام



انا = خلاص تخلصي منها ,,, شاطرة سلمى ,,, واوعدك اشتريلك وحدة غيرها بس اسلامية



قمت عنها ,,, افففففف الله ياخذ وجهك ياخالد ورطتني ,,, الحين لازم اخرب الفلوس القليلة اللي معي بدمية ,,, شسوات الحين اففففف



طلعت من البيت اسولف مع ابراهيم وصالح وكان معهم ماجد



بعد مرور يومين ,,, فجر السبت



قمت اصلي الفجر وكالعادة حاولت اقوم سويلموه وعيا يقوم



طلعت من البيت وتفاجأت بسيارة خالد واقفة قدام باب بيتي ,,, الحمد الله والشكر قضن الاماكن مايوقفها الا هنا ,,, بيوريني انه عنده سيارة والا أيش ,,, مالت عليه وعلى شكله



بعد الصلاة وقبل ادخل البيت



= خااااااااالد



التفتت وكان خالد يناديني ,,, وش يبي ذا ,,, كان لابس بنطلون كالعادة وشكله توه جاي من المسجد ,,, وصل عندي



خالد = السلام عليكم



انا = وعليكم السلام



خالد = بترجع تنوم .؟



ابتسمت قالها بلهجة اهل الرياض



انا = تبي شي .؟



خالد = لا ,,, بس طفشان وماعندي احد اسولف معه ومابي ادخل البيت



انا مستغرب = ليه ماتبي تدخل البيت .؟



خالد = البيت مافيه الا خالتي وخالي ماهو موجود



ضحكت عليه ,,, مطير عيشته صالح



انا = هههههههههههههه



خالد بابتسامه = لا تضحك يبليك الله بواحد مثل صالح عمتي وعمتي كأن محد له عمة الا هو ,,, اذا شافني بالبيت وخالي مو هنا قام يتهاوش معي



انا = لا مابرجع انام



ابتسم و مسك ذراعي وسحبني



خالد = اجل تعال نسولف في السيارة



فتح سيارته وركب وركبت معه ,,, هذي اول مرة اركب سيارته ,,, الصراحة فخمه لكن المرتبه الورانية صايرة حوووووووسه ماينركب فيها كتب ودفاتر وكم بنطلون وفنيله والثوب والشماغ معلقين ,,, والله مادري وشوله هالثوب وهو مايلبسه



التفتت له



انا = خالد ليش موقف سيارتك هنا .؟



خالد = شف صالح وين موقف سيارته



وكان صالح موقف سيارته بالمكان اللي بالعادة خالد يوقف سيارته فيها قدام بيت ابو عبد الله



انا = شكله يبي يضايقك ,,, من يوم ماعرفت صالح ماعمري شفته يوقف سيارته هنا ,,, ماعليك منه وانت ماسويت شي غلط ,,, ساكن عند خالك



خالد تنهد = الله يصبرني عليه بس المشكلة كرّه العجوز فيني



انا باستغراب = أي عجوز .؟



خالد = مرة خالي ( وكمل بسخرية ) خالتي



انا = ليه وش سوت .؟



خالد = يوم جيت امس من الرياض



قاطعته



انا = انت متى جيت .؟



خالد = امممم اظن الساعة 11 في الليل



انا = ايه كمل وش سوت خالتك .؟



خالد = يوم جيت أمس من الرياض لقيتها ناقله غرفتي للملحق تبيني انام واذاكر واحل واجباتي في الملحق ,,, مدري وش غيرها علي ,,, اول ماجيت كانت تعاملني مثل ولدها ,,, والحين ,,, ( تنهد وسكت )



انا = اكيد احد نقل الغرفة لها هي عجوز ولا تقدر تنقل شي ,,, تتوقع خالك موافق على اللي تسويه .؟



خالد = لا طبعا ,,, اصلا خالي من يوم الجمعه وهو ماهو فيه ,,, وبعدين مايبيلها تفكير اكيد ياصالح يامحمد او أي احد من عيال اخوها



انا = طيب وش حادك تدرس هنا ,,, الرياض مليانه مدارس ,,, وغير كذا اهلك كلهم هناك



غمض عيونه ونزل راسه على الدركسون ,,, مدري ليه حسيت انه متألم ,,, حاولت فيه يجاوبني



انا = خالد قلي وش حادك تدرس هنا .؟



رفع راسه وسند ظهره على المرتبة مرة ثانية



خالد = انا اقدر استاجر شقة ,,, بس اعرف خالي مايبيني اطلع من بيته واستاجر ... بيزعل مني



انتبهت ان الشمس طلعت وصار لازم اقوم اخواني للمدرسة



انا = عن اذنك خالد شوي ابروح اقوم اخواني



خالد بابتسامه = صح تعاااااال وشلون سالم وسلمى ,,, هههه تصدق اشتقت لهم



انا = هههههه تسلم ,,, سالم وسلمى بخييييييير



وطلعت ,,, قومت خلود واخذت نص ساعة عشان اقوم سالم ,,, غيرت ملابسي على السريع ويوم تأكدت ان سالم قام طلعت لخالد ,,, فتحت باب الراكب لكن تفاجأت بخالد نايم .... شكله تعبان بس لا يمكن اخليه يكمل نومه على الاقل عشان مدرسته يمكن تروح عليه نومه ,,, ركبت وسكرت الباب ,,, لكن ماقام شكل نومه ثقيل



انا = خالد ,,, خالد قم



قام وقعد يتلفت كأنه متفاجئ



خالد = اووووه شكلي نمت ,,, وينك تأخرت



انا بابتسامه = سالم وسلمى نومهم ثقيل



خالد = شف بدا الطلاب يطلعون من بيوتهم



انا = بعضهم يرحون بدري



= صدتكم ,,, وش تسووون .؟



نقزت انا وخالد متفاجئين ,,, وكان ابراهيم مدخل راسه من عند دريشة الراكب ( من عندي ) وفاجأنا



انا = بسم الله الرحمن الرحيم ,,, تنحنح ياخي



ابراهيم = هههههههههه ماذا تفعلان ايها الخالدان .؟



خالد = نسرق ,,, من وين طلعت انت .؟



ابراهيم = من تحت الارض



خالد = ماخبرك شيطان



ابراهيم = يله عاد



خالد = ههههههههههههه امزح معك يارجال



ابراهيم = بتروحون مشوار هالحزة ,,, الحين وقت مدارس



انا = ندري ,,, اففففففف متى نفتك من هالمدارس



ابراهيم = هااااااانت ,,, هذي آخر سنه ياسلااااااام ,,, تصدقون ماني مصدق



شفت صالح جاي لنا ,,, اووووووه ,,, التفتت لخالد



انا = خالد شف صالح جا



خالد متضايق = اشوفه



وصل صالح وعلى وجهه ابتسامه سخرية ودخل راسه من عند دريشة السواق ( من عند خالد )



صالح = اشوفكم مجتمعيييييييين



والتفت على خالد وتوسعت ابتسامته



صالح = قايم بدري اليوم ,,, ليه مارتحت بالنوم .؟



خالد بعصبية = وش قايل لخالتي أنت .؟



صالح = هههههههههههههههاي ,,, حلوة ذي خالتي ,,, اقووووووول متى جيت



خالد = مالك دخل



همس باذني ابراهيم



ابراهيم = بدت الهوشة



صالح = قلتلك ياخي من البداية لا تجي عندنا اذلف لابوك وعيش عنده ,,, وفكنا من وجهك ,,, بس انت دجاجة ماتفهم



طوال ماصالح يتكلم اخذ خالد ربع ورقة من احد الدفاتر اللي ورا ودخلها بفمه واخذ يعلجها ولما انتهى صالح من كلامه تفل الورقة بوجه صالح ,,, كلنا تفاجأنا من حركته ,,, لما استوعب صالح الحركة ,,, فتح باب خالد بعصبية وهجم عليه ,,, مال خالد علي بسبب ركوب صالح عليه ,,, وصاروا يتهاوشون ,,, حاولت ابعد صالح عنه ,,, وابراهيم دار حولين السيارة و حاول يجر صالح ,,, حاولنا نبعدهم عن بعض لكن صالح اخذ يضرب خالد كفوف وخالد يحاول يضربه و يدافع عن نفسه ,,, لين اخيرا قدرنا نبعدهم



صالح بعصبية = ان ماوريتك يالكلب ,,, ( وسحب يده من ابراهيم ) فكني



خالد بعصبية = مالكلب غيرك



صالح = قسم لردها لك



وراح وهو يسب ويشتم



انا = ابراهيم رح له



ابراهيم = خلك مع خالد



وراح يلحق صالح ,,, التفتت على خالد ,,, كانت انفاسه سريعه ,,, أخذ منديل و مسح خشمه عن الدم ,,, كان باب خالد مازال مفتوح و بسبب الهوشة منزل رجل وحدة بالارض

تفاجأت بسالم واقف قدام خالد وهو يتفحصه ,,, متى طلع ذا



سالم = ليه تتصارعون انت وصالح ,,, اشووووووف ورني



وركب بحضن خالد وشنطته على ظهره



انا = سالم متى طلعت .؟ يله رح مدرستك



مارد علي مازال يتفحص خالد



خالد وانفاسه سريعه = سالم يله رح مدرستك لا تتأخر



ونزّل سالم من حضنه ,,, والتفت لي



خالد = وانت بعد رح مدرستك



انا = وانت .؟



خالد = وانا بعد



انا = خالد ابعد عنه تراه يحب المشاكل



نزل خالد من السيارة وفتح الباب اللي ورا واخذ الثوب والشماغ المعلقين



خالد = ابروح اغير واغسل وجهي ماراح اطوّل



ودخل بيت خاله



دخلت البيت حاولت اقوم سلمى وعيت تقوم شلتها ومعاذ يمشي وراي ,,, طلعت خلود وراحت مدرستها ,,, نزلت سلمى ومعاذ ببيت ابو سعد ,,, ورجعت البيت وقفلته ,,, جاني خالد ولأول مررررة اشوفه لابس ثوب ولا وبعد كااشخ بشماغ



خالد = خالد شفتك تودي سلمى وهي نايمه لهذاك البيت ,,, ليه ,,, ومن البزر اللي كان معك .؟



انا مستغرب = بزر .؟



خالد = ايه البزر اللي كان يمشي وراك ,,, من ولده .؟



انا بابتسامه = هذا اخوي



خالد مستغرب = لك اخو غير سالم .؟



انا = ايه



خالد = تصدق توني ادري ... طيب ليش وديت سلمى لهذاك البيت ... ومن بيته هذاك .؟



انا = اجل اخلي سلمى لحالها في البيت



خالد = دخلها الروضة



على باله كل الناس قادره مثله



انا = ومعاذ ادخله الروضه بعد .؟ و تراك بتأخرني عن المدرسة ,,, مع السلامة



مشيت عنه ,,, لكن هو مسك ذراعي



خالد = تعال بوصلك بطريقي



انا = لا مايحتاج مدرستي قريبة



خالد = إلا يحتاج ,,, اركب اركب



ركبت معه ووصلني وراح ,,, دخلت الفصل ,,,



لحظة لحظة وشلون نسييييييييييت ,,, مو كني سمعت صالح يقول لخالد اذلف لابوك ,,, حركة خالد نستني ,,, وشلون يعني ,,, يعني خالد موب يتيم مثل ماكنت متوقع

* 4 *























الظهر



طلعت من المدرسة مع صالح وابراهيم وماجد ولما مرينا على سيارة صالح



انا = صالح اشوفك موقف سيارتك بمكان سيارة خالد



صالح بغرور = وصار مكان سيارتي عندك مانع



التفتنا انا وابراهيم لبعض وحنا فاهمين حركات صالح



ابراهيم = بس انت ماصرت توقفها قدام بيت ابو عبدالله إلا يوم جا خالد



صالح = كيفي ( والتفت لي ) وانت لا تخلي خالد يوقف سيارته قدام بيتك



انا = والله متى ماصار المكان مكان ابوك تعال تكلم



صالح بعصبية = كذا يعني



ابراهيم = هدوا اللعب شباب



دخل ابو عبد الله الحارة بسيارته ولما مر من عندنا قالّي انه يبيني وبعدها دخل سيارته لكراج بيته ,,, وطلع من بيته يحتريني ,,, رحت له وصالح وابراهيم راحوا بيتوهم



انا = السلام عليكم ,,, آمر ياعم



ابو عبد الله = وعليكم السلام ,,, خالد وانا عمك وشلون وضعكم محتاجين شي .؟



نزلت راسي ,,, الحال صعب طلبات البيت واخواني كثيرة وماباقي من قيمه المكدة الاخيرة الا 80 ريال



انا = ابد ياعم مانحتاج شي انا معي اللي يسد والحمد الله الحال مستور



ابو عبدالله = خالد لقيت لك وظيفة



رفعت راسي له بلهفة



انا بفرح = والله ,,, وييييين .؟



ابو عبد الله = بس فيه مشكلة وماعتقد ياولدي بترضى فيها



انا مستغرب = مشكلة وش ياعم .؟



ابو عبدالله = الوظيفة تناسبك ومثل ماتبي ماهي وظيفة ليلية بس المشكلة الوظيفة ماهي داخل المدينة



انا بخيبة أمل = ماهي بداخل المدينة ,,, اجل وين .؟



ابو عبدالله = بقرية تبعد من هنا 100 كيلو يعني تحتاج سفر كل يوم او تاخذ اخوانك وتسكنون بالقرية



انا = من وين اسكن ,,, وانا اجار بيتي هذا مادفعته



ابو عبد الله بابتسامه = بس كذا ,,, مستعد ادفعه عنك انت ولدي واعزك



انا متضايق = تسلم ياعم ماتقصر بس مابي اتعبك وللأسف ماقدر اسافر يوميا صعب ياعم صعب غير كذا ماعندي سياره وغير كذا بعد ماقدر استاجر وغير كذا بعد من عنده اترك اختي صعب والله صعب



دخل خالد الحارة بسيارته ,,, ولأن صالح موقف سيارته قدام بيت ابو عبد الله وقف خالد سيارته قدام بيتي وجا ,,, استغربت مشيته يجر رجليه جر ,,, وواضح عليه التعب ,,, الشماغ بيده والعقال حاطه براسه ,,, وصل عندنا



خالد بهمس = السلام عليكم



انا وابو عبد الله = وعليكم السلام



ابو عبد الله = خالد يابوك فيك شي .؟



خالد وهو يحط يده على راسه = صداع خفيف ,,, ليش تأخرت ياخال



ابو عبد الله = تعطلت علي السيارة اليوم واحتريتهم يصلحونها



خالد = وليه ماتصلت علي اجيك



ابو عبد الله بابتسامه = الله يرضى عليك مابغيت اشغلك عن مدرستك وبعدين شكلك تعبان ياولدي ,,, ماكلك دواك .؟



خالد بملل = لا نسيت ,,, خلونا ندخل ,,, الشمس حاره



انا = آآآ ,,, مع السلامة ,,, لازم امشي



ابو عبدالله = لا لا لا مافيه مشي ,,, اليوم غداك عندي



انا = تسلم ياعم بس لازم اجيب سلمى ومعاذ واكيد يحتروني الحين



ابوعبدالله = رح وصلهم بيتك وتعال لا تتعذر ,,, اليوم عيالي بيتغدون معي ,,, يالله وانا عمك احتريك



مصررررر ,,, رحت البيت وعلمت خلود اني معزوم وبعدها جبت سلمى ومعاذ للبيت ,,, ورحت لبيت ابو عبد الله,,, طبعا الباب كان مفتوح يحتروني ,,, دخلت المجلس وماكان فيه إلا خالد ,,, وكان لابس بنطلون ,,, ذا مايصبر عن البناطيل ,,, كان منسدح على الكنب ولما دخلت اعتدل وجلس



خالد = هلا خالد ,,, وش فيك تأخرت



انا = جبت سلمى ومعاذ ,,, وين خالك .؟



قام خالد بتعب وجلس بجنبي



خالد = خالد خالي عرف ان مرته نقلت غرفتي للملحق وعصصصب وراح لها ,,, الله يستر اخاف تصير مشكلة بينه وبينها والسبب انا ( تنهد وكمل ) ودي اطلع ماني مرتاح هنا



انا = تطلع تروح وين .؟



خالد = أي مكان ,,, استاجر بيت شقة ان شاء الله غرفة في فندق أي شي ,,, المهم اطلع



انا = خالد للمرة الثانية اسألك وش اللي حادك تدرس هنا.؟



طالعني بألم وتعب وطوّل وهو يطالعني كنه يبي يقول شي ومتردد بعدها غمض عيونه ونزل راسه



انا = لو انك بجامعة قلنا ماقبلته جامعات الرياض لكن تترك اهلك وبيتك وتدرس هنا وانت الى الحين في الثانوي ,,, ( وحاولت اترجاه يقول اللي في خاطره ) خالد فيك شي قلّي.؟



مازال منزل راسه وساكت



انا = طيب معاملة ام عبد الله قاسية معك .؟



خالد بحزن = اول ماجيت لا ,,, كانت فرحانه فيني وتعاملني زي ولدها ,,, لكن صالح دايم وهو مطيح عندنا واكثر الاحيان نتهاوش قدامها وطبعا لأن صالح ولد اخوها تدافع عنه ,,, لين هه زي ماتشوف كرهتني



دخل ابو عبدالله معصب وجلس والتفت على خالد



ابو عبدالله = خالد غرفتك الاولى ترجعلها وانا بجيب عمال ينقلون اثاثها لك وانت اللي داخل وهي اللي برا



التفت خالد لي مرتبك ثم التفت على خاله



خالد مرتبك = لا ياخال انا مرتاح هنا وبعـ



قاطعه ابو عبدالله معصب



ابو عبدالله = قلت لك ترجعلها ,,, ولدي انا يختار أحسن غرفة ويجي فيها واذا ماعجبها تروح بيت اخوها



افاااااا شكله واصلة حده



خالد مرتبك = لا وش دعوى ياخال ماتوصل لهدرجة انا صدقني ابي الملحق عشان هذا شسمه ,,, عشان آآآآ ,,, عشان خالد



وأشر لي



انا منصدم = أنا .؟



ضربني بكوعه ,,, التفت لي ابو عبدالله مستغرب



ابو عبدالله = عشان خالد .؟



خالد مرتبك = ايه عشان خالد اقدر ادخله غرفتي ,,, الحين لوغرفتي داخل البيت ماقدرت ادخل خالد للغرفة ,,, احسن تصير غرفتي بالملحق يعني من باب الشارع على غرفتي على طول ( والتفت لي ) صح خالد .؟



ابو عبد الله = يعني انت مرتاح كذا



خالد = ايه



ابو عبد الله = أكيد تبي الملحق .؟



خالد = ايه



ابو عبدالله = زي ماتبي ياولدي المهم راحتك ( والتفت لي وابتسم ) البيت بيتك ياخالد ,,, وغرفة خالد غرفتك ,,, ماتدرون وش كثر فرحتي يوم اشوفكم اصحاب ,,, الله يزيد المحبة بينكم ,,, اروح اجيب الغدا لكم



خالد = اجلس ياخال انا اروح عنك



ابو عبد الله = لا لا انت شكلك تعبان



وطلع ابو عبد الله ,,, التفتت على خالد



انا بطرف عين = اجل عشاني ادخل غرفتك هااااه



خالد = يارجال انقذت أسرة ,,, آآآآخخخ ياراسي ,,, الصداع كل شوي يزيد



ومسك راسه بين يديه ,,, الصراحة كبر بعيني هالخالد ,,, فعلا لا تحكم في الناس باشكالهم ,,, احكم في الناس باخلاقهم وافعالهم ولا تنظر الى اشكالهم ,,, اخ بس لو اعرف وش اللي حاده يترك بيته في الرياض ويجي هنا



وحنا نتغدا مع ابو عبد الله جلس خالد بجنبي مرة ثانية



ابو عبد الله = خالد وجهك ماهو عاجبني ,,, بعد الغدا كل دواك ,,, لا تنسى



خالد متضايق = انساه ياخال واصلا قضى امس اففففففف



ابو عبدالله = قاضي من أمس وساكت ,,, ابي اعرف انت مهمل نفسك ليه ... ياولدي اذا كنت ماتبي نفسك انا وامك نبيك الله يصلحك بس ,,, عطني اسم علاجك اجيبه لك العصر



ابتسمت شكل خالد غالي بالحيل عند اهله وخاصة عند خاله



خالد = مايحتاج انا اروح بس الحين ابي انوم ( التفت لي ) خالد ذكرني بعد الغدا اخذ رقم جوالك ,,, دايم انسى اخذه منك



وكمل اكله ,,, نزلت راسي يعني مايقولي الا قدام خاله



انا = ماعندي جوال



ابو عبد الله مستغرب = وجوالك وينه .؟



والله الاحراج ,,, اوريك ياخالد صبرك علي



انا بهمس = بعته



التفت خالد لي متفاجئ



ابو عبد الله مستغرب = ليه ياولدي ,,, محتاج شي



انا = لا بس ,,, آآآآ ,,, مليت منه وبعته



سكت عني ابو عبد الله ,,, وقرب خالد راسه لراسي وقال بهمس



خالد = بعت سيارتك والحين بعت جوالك بعد



قربت راسي له اكثر عشان ابو عبد الله مايسمع



انا = لا تتدخل في شي مايعنيك



خالد = وش اللي خلاك تبيع جوالك وسيارتك .؟



انا = اذا جاوبتني اجاوبك .؟



خالد = اجاوبك عن وش .؟



انا = وش حادك تدرس هنا .؟



خالد = وش دخل هذي في هذي .؟



ابو عبد الله بابتسامه = يازينكم والله ,,, خلصوا غداكم ولاحقين على السوالف



كملت اكلي منحرج من ابو عبدالله وقعدت اسولف معه بسوالف عامه اما خالد فكان ساكت ,,, بعدها رجعت البيت



العصر جانا عمي ,,, وكنت جالس معه انا وخلود ومعاذ اما سالم وسلمى يلعبون برا



خلود = عمي المطبخ محتاج اغراض وخالد مامعه شي



ابو مشعل = اووووهووووو علينا ,,, متى افكك منكم انا ,,, تحدّوني ماجيكم والا وشلون ,,, وانت الى متى عاطل باطل ,,, اشتغل اشتغل لو فراش بس اشتغل



انا = مامعي الا 80 هه شف



وطلعته قدامه ,,, التفت عمي لخلود



ابو مشعل بعصبية = روحي اكتبيلي الطلبات خلصيني



قامت خلود بسرعة وبعد 10 دقايق عطته ورقة الطلبات ,,, طلع عمي من محفظته ميتين ريال ورماهن علي



ابو مشعل = خذ ,,, ادري انك ماتبي تشتغل ومعتمد علي ,,, بس من الحين وطالع كل شي اعطيكياه محسوب على الدين اللي على ابوك



وطلع معصب من البيت ,,, بكت خلود بصمت ,,, اخذت الميتين بصمت ورحت غرفتي ,,, انا قادر اسدد الدين عشان يزيد هذلي علي ,,, شسوات ياربي شسوات



بعد صلاة العشا بساعة



خلود = خالد خلك مع معاذ يزعجني مايخليني انام



انا مستغرب = تنامين الحين .؟



خلود = ايه بنام شوي ,,, خلك مع معاذ



وراحت ,,, اخذت معاذ معي وطلعت فيه من البيت وكانوا برا صالح وابراهيم وماجد طاقينها سوالف وسلمى وسالم يلعبون مع البزارين ,,, وصلت للشباب



ابراهيم = هلا خالد ,,, عطني عطني معاذ ( واخذ معاذ مني )



ماجد = ياحليييييييله هات هات ( واخذ معاذ منه )



صالح = انتوا متأكدين انه ولد كنه بنت ههههههه



انا = هههههههه هذا من زود الجمال ههههههههه ,,, هات اخوي تضايق منك ( واخذت معاذ من ماجد )



طلع خالد من بيت ابو عبدالله وتوجه لسيارته قدام بيتي وركبها وشغلها وكان بعيد عنا شوي ,,, رحت له وطليت عليه من عند دريشته ,,, وتفاجأت من شكله ,,, وجهه شاحب والهالات واضحة ,,, ابتسم خالد وفتح الدريشة لي



خالد بابتسامه = هلا خالد ,,, ( وتوسعت ابتسامته ) هذا اخوك ,,, هاته هاته ,,, شسمه .؟



انا = معاذ ( وعطيته معاذ )



خالد = وش فيك واقف ,,, اركب



درت حولين السيارة وركبت ,,, واول ماسكرت الباب ويجون سالم وسلمى ووقفوا عند خالد



سلمى = وين بتروحون .؟



سالم = بروح معكم



خالد = انا زعلان منكم ,,, ليه ماعلمتوني ان عندكم اخو حلو مثل معاذ



فتحت سلمى باب خالد وركبت بحضنه ,,, صار شكله مضحك سلمى ومعاذ بحضنه باقي سالم ويمكن اجي انا معهم بعد هههههه



سلمى = انا زعلانة منك



انا = سلمى انزلي ,,, تعالي عندي



خالد بابتسامه = وليه زعلانة .؟



سلمى = انت تبي الملائكة مايدخلون بيتنا



ضحكت عليها وعلى شكل خالد انصدم مسكين



خالد مستغرب = انا .؟



سلمى = انت شريتلي عروسة والعروسة تخلي الملائكة مايدخلون بيتنا



خالد = من قالّك .؟



سلمى = خالد



التفت لي وهو يبتسم



خالد = انت .؟



هزيت راسي بإية



انا = المفروض تعلمها مو تشجعها



توسعت ابتسامة خالد وقعد يطالعني ,,, استغربت منه



انا = وش فيك تطالعني كذا .؟



التفت لسلمى



خالد = ولا يهمك سلومتي الحين نروح ونشتري لك لعبة غيرها ,,, اركب سالم ( عطاني معاذ وجت سلمى بيني وبينه )



انا بعصبية = تعال تعال وش تشتري ماتشتري ,,, لا تركب سالم



خالد = اشششش انت ولا كلمة كسرت نفس البنت ولازم نشتري لها وحدة غيرها وبنشتري لمعاذ بعد ,,, اركب سالم



انا = ابشتري لها انا بنفسي ,,, لا تركب سالم



خالد يحذرني = خااااالد



انا احذره = خااااالد



ضحك خالد وركّب سالم من جهته



خالد = ههههههههههههههه والله انك ,,, يله سلمى سالم روحوا ورا



انا = انت ماتفهم ... قلت لك لا تشتري ,,, يله انزلوا انتوا يله



خالد = خالد وش فيك اعتبرها هديتي لهم وبالمرة نتمشى شوي بالسيارة



انا = وين كنت بتروح .؟



خالد = بروح للصيدلية علاجي خلص وبعدها نتمشى



سالم = يووووووووووه وش هذا .؟



التفتت انا وخالد له مستغربين



انا وخالد = وش .؟



سلمى بعصبية = وين نجلس الحين .؟



خالد = هههههههههههههههه سامحينا عمتي ههههههههههههههههههه المرتبة حوسه ... زيحوا ملابسي والكتب عنكم بجهة واجلسوا بالجهه الثانية



نفذوا سالم وسلمى كلامه ,,, وحرك خالد السيارة وقبل يمر من عند الشباب ,,, اعترض صالح طريق السيارة وقعد يشّر عشان يوقف ,,, وقف خالد السيارة وجا صالح من عند دريشته ووراه ابراهيم وجا ماجد من عندي ,,, قبل يتكلم صالح على طول التفت خالد ورا



خالد = سالم عطني الدفتر هذا



عطاه سالم الدفتر وبسرعة شق خالد ربع ورقة ودخلها فمه ,,, انا وابراهيم متنا ضحك عليه وسديت فم خالد بيدي ,,, وسحب ابراهيم صالح وهو يضحك



صالح بعصبية = وش تعني بحركتك هذي .؟



ابراهيم = ههههه هدوا اللعب شباب ,,, امش امش خالد ههههههههه



مشى خالد ,,, وابعدت يدي عن فمه وانا اضحك عليه



انا = ههههههههههههههههههه صرت تطلق قنابل عنقودية ههههههههههههههههه



تفل خالد الورقة برا السيارة



خالد = كرهني بعيشتي



وقفنا عند احد الصيدليات ونزل خالد وبعد خمس دقايق جا ومعه كيس العلاج ,,, ركب السيارة وعلى طول فتح الكيس واكل الحبوب مع الماء الصحة



انا = شكلك ماتصبر عنها



خالد بتنهيده = الحمد الله على كل حال ,,, بعد ماأغمى علي صرت احسن شوي



انا منصدم = اغمى عليك اليوم .؟



خالد = ايه قبل صلاة العصر بشوي



انا = ومتى قمت .؟



خالد = وهو يذن العشا ,,, على بال ماصحصحت قضيت الصلوات وطلعت على طول



انا = وتسوق وانت تعبان ,,, وقف وقف انا بسوق



مرينا محل الالعاب وتمشينا بالسيارة شوي وعلى الساعة 11 رجعنا لاني ماقدر اسهر واجد واترك خلود لحالها غير كذا بكرة مدرسة



بعد يوم ,,, يوم الاثنين



جانا عمي العصر وجاب اغراض المطبخ اللي طلبتهم خلود وطلع من دون مايكلمنا



خلود = خالد شكل عمي زعل منا



انا = خليه يزعل



ومسكت سالم بالقوة عشان يحل واجباته وبعد ماخلص اطلقته



بعد العشا طلعت من البيت ابي اسولف مع أي احد ,,, بس الغريب ماشفت احد من الشباب بالشارع ,,, ماكان فيه الا الاطفال



رحت لسالم والمجموعة اللي معه



انا = سالم شفت صالح او ابراهيم او خالد .؟



قال واحد من الاطفال بكبر سالم



= صالح وابراهيم راحوا بسيارة صالح



انا = وخالد .؟



= هذي هي سيارته ,,, بس مدري وينه



رحت عنهم ,,, خلني اطلع خالد من البيت يسولف معي ,,, ضربت جرس ابو عبد الله وطلع لي خالد



خالد = هلا خالد حيااااك



انا = الله يحييك ,,, وش فيك حابس نفسك بالبيت ,,, اطلع خلنا نسولف



خالد = اممممم وش رايك بالمرة نروح لكوفي



انا = لا لا مايحتاج خالد ,,, الاهــ



وقاطعني



خالد = إلا إلا يحتاج بس اصبر ابدل ملابسي واجيب مفتاح السيارة



وراح ,,, دخلت البيت وعلمت خلود اني يمكن اتأخر وبعدها مريت سالم وسلمى وآمرتهم يدخلون البيت على الساعة 9 وهددتهم اذا تأخروا اكثر



وقفت عند سيارة خالد احتريه ,,, وش فيه هذا تأخر ,,, بعد خمس دقايق جا خالد ولابس بنطلون جنز أسود وفنيلة بيضا



انا = وش فيك تأخرت .؟



خالد = اتصلت علي أمي ,,, يله اركب



ركبت معه ولأن خالد الى الحين مايدل الاماكن زين دليته انا على كوفي



بعد ماخذنا مكاننا بالكوفي



انا = خالد فيه حاجة ابي اعرفها عنك و ياليت ماتزعل من سؤالي



نزل خالد الكوب بابتسامة وناظرني



خالد بابتسامه = صاير رسمي ,,, وشوله هالمقدمات ,,, قل وش تبي تعرف .؟



انا = ابوك .؟



تفاجأ خالد



خالد = ابوي ,,, وش فيه .؟



انا = ابي اعرف أي شي عن ابوك ,,, اسمحلي على هالسؤال ,,, آآآآ ,,, ابوك حي .؟



طول وهو ساكت وسكتت انا احتريه يتكلم



خالد = حي ,,, ( وكمل يشرب القهوة وهو ساكت )



انا = الله يطول بعمره لكم ,,, وش فيك لا يكون زعلت .؟



خالد = لا ابدا مازعلت ولا شي ,,, وش رايك نلعب بلياردو .؟



انا = لا خلنا نتمشى بالسيارة



خالد بابتسامه = فكرة حلوة ,,, يله



وقام ,,, مادري ليه حسيت انه زعل



قمت وطلعنا من الكوفي جت الساعة 12ونص في الليل وحنا نفرفر بالشوارع ,,,



جت فجأة سيارة ورانا وصارت تكبس وتضرب البوري علينا كأنها تبغانا نوقف ,,, التفتت ورا وكانت السيارة هايلكس غمارتين جديدة فيها اربع شباب ,,, التفتت على خالد



انا = خالد السيارة اللي ورانا تبغانا نوقف



خالد وهو يشوف المرايا الامامية = اشوفها ,,, ماعرف احد راعي هايلكس ,,, والسواق ماشوفه زين من الظلمة ,,, تعرفهم انت .؟



انا = لا ,,, وقف وقف شف وش يبي



وقف خالد على طرف الطريق ونزل ,,, التفتت ورا ,,, وشفت السيارة الثانية وقفت ورانا وأول مانزل السواق والراكب ,,, تراجع خالد على ورا ,,, وبسرعة البرق ركب السيارة ومشى فيها بسرعة جنونية ,,, استغربت تصرفه



انا = خالد وش فيك ( والتفتت ورا )



شفت الثنين رجعوا وركبوا بسرعة ولحقونا بنفس سرعة خالد ,,, شسالفة .؟



انا = خالد من هذولي .؟ ,,, وليش مشيت .؟ ,,, ووش يبون .؟ ,,, خالد



كانت انفاسه سريعة وكأنه خايف ويتكلم بكلام مافهمت منه أي شي



خالد = لا ,,, لا ,,, الى متى ,,, الى متىىىىىى ,,, لا,,, برتاااااااح



انا بخوف = خالد وش فيك .؟ ليش ماوقفت .؟ خاااااالد لا تسرع ,,, خالد خالد هد السرعة ,,, خالد يامجنووووون



التفتت ورا ومازالت السيارة ورانا ,,, رجعت التفتت لخالد



انا = خالد وقف ,,, وقف



خالد بصراخ = اسكت ( ورفع نظره للمرايا الامامية ) الى الحين وراي ,,, الى متى .؟ الى متى .؟ خالد وين اروح ,,, دلني ,,, دلني ,,, خالد الطريق هذا وين يودي .؟



حاولت اميز الطريق وانا مازلت منصدم وخايف



انا بخوف = هذا طريق حايل ,,, ارجع



خالد وانفاسه سريعة = حايل .؟ ,,, وشلون اضيعهم عني ,,, ابي حارة ابي سوق ابي أي شي ,,, خالد مادل شي ,,, دلني دلني



انا = خذ المخرج اللي هناك وارجع



نفذ خالد كلامي ورجع ,,, الحمد الله اننا ماطلعنا من المدينة مرة ,,, التفتت ورا ومازالت السيارة ورانا لكن بعيدة شوي ,,, المشكلة مافيه زحمة عشان يضيعوننا ,,, ناظرت خالد لقيته احيان يناظر المرايا الامامية واحيان يناظر المرايا الجانبية ويرجع يطالع قدام



خالد = دلني وين ارووووووووح ,,, لاااااا لااااااا ,,, خـ خـ خالد وين يودي الطريق هذا ,,, ابـ



قاطعته



انا = ورا المبنى هذاك لف يميييييين فيه سوق ادخله ولفلف لين تضيعهم ( والتفتت ورا )



خالد = سوق ,,, اخـ اخاف زحمة واصدم احد



انا بعصبية = زحمة بهالوقت ياغبي الساعة الحين 1و ربع ادخل ادخل بس



نفذ خالد كلامي ودخل السوق وقعد يلفلف



خالد = وينهم .؟ آآآآ هذا نفق مواقف سيارات ,,, ابدخله



انا = لا ,,, لاتدخل ,,, المواقف مغلقة الحيييييين



خالد = وينهم ماشوفهم



انا = اكيد قريييييب ,,, اخاف يصادفونا خالد ,,, اطلع من السوق بسرررررعه



خالد = وين الطريق الرئيسي .؟



دليته وطلعنا من السوق ,,, التفتت ورا وماشفت سيارتهم ورجعت اطالع خالد



انا = خالد شسالفة ,,, من هذول .؟ شكلهم مصرين وانا اول مرة اشوفهم الصراحة ,,, وانت مانت طبيعي ,,, قلّي وش يبون فيك .؟



كان مازالت انفاسه سريعة وكل شوي يناظر المرايا الامامية والجانبية



انا بعصبية = قلتلك رااااااااااااحوا ,,, بتكلم والا وشلووووووون .؟



أخذ طريق الرجوع للبيت وهو ساكت ,,, عصبت انا



انا بصراخ = ليش ساااااااكت .؟



غمض عيونه بقوة وفتحهن



خالد = بقوووول بس لا تعلي صوتك ( وكمل بضعف ) عورت راسي



استغربت تغير صوته ,,, وش فيه ذا ,,, طيب ياخالد صدقني لولا مرض راسك كان ماسكت عنك ,,, ابسكت واشوف وش آخرتها معك



وصلنا ووقف خالد سيارته قدام بيتي وطفا السيارة وصرنا 3 دقايق وحنا ساكتين ,,, لكن هو مازال ماسك الدركسون وساكت ,,, احتريه يتكلم يقول شي يفسر اللي صار قبل شوي ,,, فجأة تكلم بصوت هامس



خالد = خالد تكفى خالي لا يدري



انا = اكيد



خالد = لا يدري احد حتى ابراهيم



انا = طبعا ,,, آآآآآ ,,, خالد من هذول .؟ ووش يبون فيييييك .؟



خالد = تبي تعرف وش يبون فيني .؟



انا = ايه



تفاجأت فيه يرفع فنيلته من ورا ويعطيني ظهره المكشوف



خالد = تشوف .؟



ناظرت ظهره بس من الظلمة ماشفت شي مديت يدي وشغلت نور السيارة من داخل



انا مستغرب = وش اشوف .؟



حط يده ورا ظهره وأشر على مكان بظهره قريب من حزام بنطلونه ويميل لجنبه اليمين ,,, انصدمت



انا = وش هذا خالد .؟



عدل فنيلته وواجهني



خالد بتنهيدة = احرقوني بسجارة



انا بصدمة = وووووششششش .؟



منزل راسه ولا يرد



انا = ليه ,,, وش يبون منك



خالد = خالد انا ,,, آآآآآ ,,, ( وسكت )



انا = انت وش .؟



خالد = انا كنت ,,, آآآآ ,,, اقصد كنا نقعد لبعد الفجر وووو ,,, وكنا مانخلي شي الا ونسويه ,,, انا ,,, آآآآ ,,, اقصد ,,, ااااا ,,, هم



انا = خالد وش فيك ,,, كمل انت وش .؟



التفت لي بسرعة ومسك يدي



خالد = خالد صدقني انا تبت ,,, تبت وعرفت طريق التوبة ,,, خالد انا ابي ارتاح ,,, ابي انسى كل شي



انا = تبت عن وش .؟



خالد تركني ونزل راسه = تبت عن السهر معهم تبت عن سماع الاغاني تبت عن التفحيط تبت عن المغازل تبت عن كل شي بس ابي ارتاح



انا = طيب الحمد الله هذا شي مفرح ,,, بس وش دخل هذا باللي صار قبل شوي ,,, من هذول ووش يبون فيك .؟



خالد = انا كنت ادبر كل شي واوفر للسهرة كل شي ,,, ماخلي شي ناقص



انا = الى الحين مافهمت شي ,,, الشباب اللي قبل شوي وش يبون منك بالضبط .؟



خالد = يبون ارجع لهم



اهاا الحين فهمت



انا = يعني هم الحين يلاحقونك واحرقوك عشان تتراجع عن توبتك .؟



هز خالد راسه بإية



خالد = ايه ومو بس هذا .؟



انا = وش بعد .؟



خالد = الاستراحة اللي كنا نسهر فيها لي ويبونها مني لأنها بعيدة عن الانظار و ماكان يضايقنا فيها احد



انا = طيب ليه مابلغت عليهم .؟



خالد = بلغت ,,, بس كل مادخلوا السجن طلعوا منها مثل الشعرة من العجين ولا يقعدون بالسجن اسبوع واحد



انا = كيف .؟



خالد = ابناء تجااار وضباط ولهم واسطات في الشرطة



انا = يعني يقدرون يدبرون سهرتهم بنفسهم .؟



هز راسه بإيه



انا مستغرب = طيب وش يبون فيك اذا كانوا يقدرون يدبرون سهرتهم ويستاجرون استراحة لهم .؟



خالد بتنهيدة = يقدرون يستاجرون بس اصحاب الاستراحات يطردونهم اذا شافوا منهم شي ,,, استراحتي كانت لي وماكان احد يضايقنا ومكانها مناسب وحلو هذا غير اني كنت اغني وصوتي يعجبهم ولا تحلو السهرة الا اذا كنت موجود وفوق هذا كنت متفوق عليهم دراسيا وكانوا يحتاجوني في اموووور كثيرة من ناحية الدراسة والسهرة ,,, بالمختصر مايستغنون عني



انا = ماظن صعبه عليهم ابناء تجار يقدرون يشترون استراحة و يسهرون



خالد = ابناء تجار مو هم اللي تجار و بعضهم ابائهم لهم استراحة او شقة بس باسم ابائهم ويستخدمونها عايلاتهم يعني ماهي دايم بتصير لهم



انا = وانت استراحتك باسمك .؟



هز خالد راسه بإية



حطيت يدي على ظهره وحاولت تكون يدي على مكان الجرح



انا = شكله عمييييييق



خالد = ماوخرها بدر الا يوم طفت بظهري



انا = اسمه بدر .؟



خالد = ايه



انا = هو اللي كان يسوق .؟



خالد = لا



انا = متى صار.؟



خالد = من شهر ,,, الى الحين الجرح يطلع منه دم وصديد



انا = وتوبتك .؟



خالد = من ثلاث شهور او اربع ماذكر زين



انا = هذا اللي حادك تدرس هنا .؟



خالد بتنهيده = ايه ,,, أمي وخالي ارغموني اكمل الثانوي هنا ,,, خايفين علي منهم



انا = وابوك ,,, وش محله من الاعراب .؟



التفت لي خالد وقعد يناظرني وبعدها نزل راسه



خالد = انا تعبان خالد ,,, انزل



انا بتنهيدة = مثل ماتبي ,,, وانا بعد تعبان ,,, مع السلامة



خالد = خالي لا يدري



انا = طبعا اطمئن ,,, مع السلامة



ونزلت ,,, دخلت البيت وتفاجأت بخلود تحتريني



انا = خلود .؟



خلود = خالد وين كنت .؟ جت الساعة 1ونص وانت ماجيت ,,, وين كنت .؟



انا = راح الوقت من دون مادري ,,, خلود تعبان وابي انام حاولي تقومني بكرة



رحت لغرفتي حاولت انام لكن التفكير بخالد طير النوم عني ,,, يالله ياخالد أثرك تورطت برفقاء سوء ولانت قادر تخلص نفسك منهم ,,, حسبي الله عليهم وش يبون فيه ,,, الرجال تاب يطاردون وراه ليه ,,, ليه مايتركونه بحاله لييييييييه ,,, يارب احفظه بحفظك



اخذت اتقلب بفراشي ابي انام لكن عجزت ,,, خالد شاغل تفكيري

قصة في قمة الرؤؤووعة
تابعي

قمت بقراءة هذه الرواية من قبل في منتدى اخر
وفعلا اعجبتني كثيرا
شكرا لنقلك
استمري